...sA ArAw ng pAskO

by mikEL Fri Dec 05, 2008 5:18 pm

SA ARAW NG PASKO

Ano nga bang aking dapat na madama?
Sa araw ng pasko dapat bang magsaya?
Dapat bang pigilin luha sa mga mata?
Sapagkat ang pasko araw ng ligaya.

Alam kong sa pasko dapat na masaya,
Dapat na limutin ang mga problema,
Ngunit pa'no itong puso ko na aba?
Kung ikaw oh sinta 'kakasal sa iba.

Itong aking puso na tapat magmahal,
Sa araw ng pasko magiging luhaan,
Aking aaminin sadyang di ko alam,
Kung paano ito ay makakayanan?

Paano ang aking pangarap at nais?
Kung itong puso ko ay maghihinagpis,
Tanong ng puso ko sa ngayon ay bakit?
Bakit ba palad ko ay sadyang kaylupit.

Kung noon ang pasko pinakahihintay,
Ngayon nalulungkot ang puso't isipan
Pagluha ng mata hindi maiwasan,
Sapagkat sa pasko ako 'yong iiwan.

Sa araw ng pasko maglalahong lahat,
Ang ating binuo na mga pangarap,
Masakit isipin puso ko'y may sugat,
Kahit inialay pag-ibig na tapat.

Sa araw ng pasko dapat kong tanggapin,
Maglalahong ganap ang pag-ibig natin,
Masakit man sa'kin dapat kang limutin,
Dapat kang iwaglit sa puso't damdamin.

Sa araw ng pasko kahit na luhaan,
Hindi magagawa sa'yo ay magdamdam,
Sa araw ng pasko kahit na iiwan
Aking hangad pa rin 'yong kaligayahan.