A mother of all our Woes by freakish_alien

Sa isang tipikal na kaanyuan ng pamilyang Pilipino, sa banta ng krisis, sa kawalan ng pagkukunan ng kabuhayan… Saan mo hahanapin ang mabuting Ina? Sapat na bang may nakahaying pandesal sa umagahan? Batayan ba ng pagiging mabuting ina ang bigyan ang anak ng diploma sa dingding, pagkain sa hapag kainan, isang desenteng bahay?

Saan at paano pa natin hahanapin ang isang mabuting Ina?

Kung iisipin at huhukayin ang tunay na kailngan ng isang anak, hindi sapat na batayan ng isang mabuting ina ang punan at tustusan ang pangangailangan ng katawang-lupa ng isang anak. Maraming pangangailangan ang isang anak na hindi nakikita at nabibigyang pansin. Sa kasaysayan at mga lathalain, sinasabing nasa aming mga kabataan-nakasalalay ang kainabukasan ng bayan at ng simbahan, malaki ang responsibilidad ng isang ina upang tawagin s'yang mabuting Ina.

Mula sa ugoy ng duyan nagsisimula na kaming magtanong. Sa bawat patak ng luha at iyak namin sa inyong kandungan, hinahabi din namin ang mga tanong sa mundong bago sa aming panlasa at paningin.. Kasabay ng pag-aaral namin ng aming unang alpabeto, ng aming unang mga tula, ng aming mga unang mga himig. Mula sa pagkabata hanggang marating namin ang ikalawang bahagi ng buhay , dumarami ang aming pagtatanong. Nadaragdagan ang pangailangan namin, maswerte kami dahil alam naming nariyan kayo para kami ay gabayan, at alam naming hindi kayo nakakalimot sa pangangailangan ng aming katawang lupa.

Sa paglakad namin sa dalampasigan ng buhay, may takot kaming nadarama sa kung ano ang darating na bukas, hindi namin alam kung saan kami dadalahin ng pagkakataon, kung saan sirkulo ng buhay sa ibabaw ng lupa kami masasadlak. Maraming mga bagay na nais naming tuklasin, mula sa aming sarili, sa aming mga kaibigan, kung anong propesyon ang mabuti para sa amin, sa mga tao at paligid. Naguguluhan kami sa iba't-ibang aral ng mundo. Mula sa adbokasya ng simbahan at adbokasya ng pamahalaan, hindi namin alam kung ano ang mas dapat naming paniwalaan, isabuhay at sundin. Iniisip namin kung ano ang intensyon ng mundo at ng tao para sa amin. At higit sa lahat kung ano ang intensyon ng Diyos para sa amin.

Kaya mabuting ina kayo para sa amin kung parehas ninyong natutugunan ang pangangailan naming inyong mga anak, ang pang-katawang lupa at pang-esperitwal. Kailngan namin ang isang ina sa mga oras na humihina ang aming esperito at paniniwala. Ang ina nagsasabi sa anak na "Anak sa Diyos ka kumapit" .Kailngan din namin ang isang ina na nagsasabing mas masarap mabuhay ng simple na nasa landas ng isang pagiging mabuting alagad ng Diyos. Kailangan din naming ang isang Idolo, ang isang ina na naglilingkod sa tao at simbahan, naghahatid ng mga aral ng Diyos , ang ina na nagsasabi sa anak ng mga nilalaman ng mabuting salita o bibliya.

Kailngan namin ng isang ina na magpapaliwanag ng maling paniniwala at pagkaunawa ng karamihan sa atin sa salitang binitiwan ng mga pari ang "Kaawaan mo ang mga naghihikahos" itoy hindi naghihikahahos sa pinansyal kundi naghihikahos na esperito ("Blessed the poor" it is not poor financially but poor in spirit). Kailangan din ng isang anak ang isang inang nakaagapay sa mga pagkakataong naguguluhan sa pangyayari ang isang anak, lalo pa kung ang isang anak ay may ibang prinsipyo at nalihis sa paniniwalang pangsimbahan. At ang inang nagsasabing "nangyayari ang lahat dahil ito ang gusto ng Diyos para sa'yo" bagay na pipigil sa amin upang saglit na matigil at gamutin ang lumalayong paniniwala.

Malalim at parang mahirap mahanap isang mabuting Ina sa sitwasyon at mayroon ngayon ang mundo. Mahirap din sa isang ina na mag-pakabuting ina sa pagkakataong naglalayag at naghahanap s'ya ng pagkukunan ng pagkain ng katawang lupa ng isang anak, mahirap dahil kailangan lumayo ang isang ina, kailangan maging isang inang OFW.

Subalit nasaan ka man mahal naming mga ina, laging nakaagapay ang Diyos at hinihintay lamang kayo para patunayan sa inyong mga anak na kayo'y isang mabuting Ina. Ano man ang layo ng dagat sa pagitan ninyo sa inyong mga anak, hayaan ninyong pagtapuin kayo ng Dioys sa pusod ng pag-ibig-sa pusod ng pagiging alagad ng Diyos. Gamitin ninyo ang technolohiyang mag-uugnay sa inyo para iparating sa Anak ang katagang "Anak napuno ako ng pag-asa at pag-ibig dahil sa paglilingkod ko sa Diyos".