eh ano?...eh ano?...

by mikEL Mon Jul 21, 2008 9:19 pm

Eh Ano?..Eh Ano?...

Kayraming napuna,mali ditong gawa,
Ngunit di sitahin,baka mamasama,
Baka ang isipin,ako'y nangungutya,
At sabihin nila,lubhang mapanira.

Eh Ano kung kopols,dito'y "in na in"?,
Sinong magsasabing,tama na't itigil?
Wala kang karapatang,sila ay punahin,
Pagkat lahat tayo,may kahinaan din.

Tanging masasabi,sa lahat ng may kopols,
Sobrang pagmamahal,wag namang ibuhos,
Para kung sandaling,hiram ay matapos,
Puso di masyadong,luluha't kikirot.

Eh Ano kung dito,mayro'ng nagsisimba?
Sobrang nag-iingay,sa oras ng misa,
Ayaw kong sabihan,pakihina pwede ba?
Baka ang itanong,ano ba ang problema?

Siguro noon lang,sila nakalabas,
Noon lang nakita,kaibigang liyag,
Noon lang nalayo,sa trabahong hirap,
At sanay sa ingay,makinang malakas.

Eh Ano kung mayro'ng,mahilig magkalat?
Maging sa simbahan,kahit hindi dapat?
Baka sa tahanan,isip ay namulat,
Sa maling kalinga,magulang na liyag.

Eh Ano kung mayro'ng,sa oras ng misa?
Celpon tumutunog,at sadyang abala,
Baka nga ang tawag,lubhang mahalaga,
Kaya di magawa,celpon "i-off" muna.

Eh Ano kung dito,uso ang "nagtsa-chat?"
Naku pag nagtagal,aba naghuhubad,
Eh Ano kung sila,katawan magbilad?
Baka doon lamang,liligayang ganap.

Eh Ano kung maraming,walang pakisama?
Ayaw kong sabihan,kabayan magbago ka,
Baka sanay lamang,mabuhay mag-isa,
Kung kaya igalang,natin kanyang pasya.

Eh Ano kung dito,marami ang plastik,
Kapag 'yong kausap,tunay na kaybait,
Ngunit pag talikod,laging sinasambit,
Mga paninira,pagkat sa'yo'y inggit.

Eh Ano kung mayro'ng,lang utang na loob?
Matapos damayan,ay nagiging hambog,
Sa isang kisapmata,agad nalilimot,
Tulong mong nagawa't,kabutihang dulot.

Eh Ano? Eh Ano? ang masasabi ko,
Huwag masamain,ang tula kong ito,
Patawad kabayan,kung ito'y di gusto,
Nawa unawain,akda kong Eh Ano?.

(a poem by besfren mikel)